kiekspel

Goj-dag, 

                 stil schoeln zelst zulf zuikn?

    

                             Veur 'n ol klain caravannetje zitn faar lu te proatn.

Ol man: Het mi begroot dat lot tau koopm mor ja, nou heb 'k won+ (beter: rondje op halfvokoal) fattig doezend. 

Jonge vent: Kin+ Ie lekker opmoakn. 's Kiekn: Elke dag faar biertjes, 's mörns twaie, 's oamds twaie en soks ook nog weggeem+. Elke dag van t' haile joar. Kin wel fattig joar duurn. 

Ol fraau: 'k Wait nait; inflatie mokt spul duurder; is slim aan gang, ja. 

Wicht: Mor misgien toch wel dattig joar. Ík heb laiver wat aans. 

F: Joa, wi kriegn toch ook wat, nee den?

M: 'k Wait nait; diz ol caravan het beste tied had. Ik kin nou 'n neie koopm.

W: Aine wat luxer as dit ol ding. 

V: Dat kin wel sloopt wordn. 

M: 'k Wait nait of dr wat overblift as 'k neie koop. 
F: Huift toch gain haile grote wordn? Elkenaine huift hier toch nait kom+ logeern. 

V: Dei olle  is misgien wat veur 'n vluchteling.

W: Dochst? Dei wiln wel wat comfort. Vast as ze leutje kinder hebm. 

F: Of 'n poitje. Den kriegn ze 'n hoes. In dörp mit toene. In Amsterdam 'n flat. 

V: Wel doar waarkt kin wel raizn. Mit train of in file.

W: Zoln ze op stadhoes nait snapm welke lu eerst aan beurt moutn kom+ om te woon+?

M: Zai zegn dat wet zo is. 

V: Leuf 'k niks van. 

M: Mien jong, hest mor te slikn. Wi bin+ in dit laand nait aalmoal gliek zoas Grondwet maint. Regentn waitn beter. Zai bin+ boas; wi nait. Kriegn in parlement aalmoal 'n dikke ton oet Onz Schatkist. 'n Referendum wiln ze nait. Kon ja goan over beter dailn. 

W: 'n Loterij is ook aans as dailn. 

M: Hest gliek. Mor nog langer in dit piepklain caravannetje bliem+? 'k Wol wel meer verdain+ en doarvan nei koopm. Mor...

V: Kapitalistn kom+ eerst aan beurt bi oetdailn. Wiln nait echt dailn. 

F: As doe loater riek bist wilst liek mi ook nait geern dailn. Koopst zulfs spul oet laandn woar arbaiders nait genog kriegn.

W: China moakt auto's. Ook caravans?

M: 'k Wait nait. As ze 't daun bin dei nait zo duur en kin ik 'n grotere kriegn.

V: En arbaiders doar onderbetoaln?

M: Och heedn, doaraan heb 'k nait docht.  Dei bin+ ja ook zo wied weg.

F: Wi huim+ gain grote.

W: Mor wel 'n mooie.

M: 'n Nuver caravan geft plezaire. Dat wiln wi fiern. Mag 'k joe inschenkn?

Zai drinkn. Eem+ stilte en in verte klinkt muziek van 'n accordeon. 

V mompelt wat.

M: Wat zeest? Hest over doem+ of over doe-oem+?

V: Over vogels; van d'ol caravan kin Ie 'n tille moakn veur doe-oem+.

W: Doar wil 'k veur doem+.

F: 'k Wait nait, dei vogels.....

V: Bin+ lekker in panne. 

F en W: Dat mainst nait!

M: As dr hongersnood komt goan ze dr aan.

W: Hier komt toch gain honger mit aal dei dikke groanboern.

V: As 'n supervulkoan ploft wil waite nait meer gruin+. Aal boern goan failliet. Partij veur Dairn denkt dat Frankriek den wel levert.

F: Fransn verkoopm aan wel maiste geld het.

M: Dat bin+ nait Grunnegers en Drentn.

W: Bartje zel broene boon+ moutn eetn...as dei nog wel gruin+.

V: Main+ Ie dat Fransn beste wien zulf opdrinkn?

M: Wat zel 'k zegn. 'k Wait nait; Fransn bin+ ook minskn. 

V: Teegn 'n supervulkoan kin+ wi niks oetrichtn. Teegn meteorietn wel. Mit raketn. 

M: Den hest meer neudig as nou in Oekraïne en Isrel. Hail zwoare. 

Wied weg klinkt licht zoem+. 

F: Loatn wi doar nou nait aan denkn. Loatn wi bliede weedn mit straks 'n nei caravan.

W: In 'n modern kleurtje. Of toch gewoon wit?

V: Ik vin spikkeltjes mooi. Rose en gruine.

M: Ha, ha, zover krigst mi nait. 

F: Gordientjes misgien zo.

W: Of bedsprei. 

M: Nou kin+ wi den ook wel drinkn op inrichting van caravan.

Wordt weer inschonkn. Stilte bi t' drinkn. Wied weg klinkt licht monotoon hoeln.

M: Wat is dat.

Aal lustern. V kiekt noar publiek: 'k Wait nait. 

F: t' Komt dichterbi.  

W: 't Is gain auto.

V: Ook gain vlaigtuug.

F: 't Zel toch gain raket weedn?

Aal om beurtn: 'n Raket?

't Geluud neemt tau en word hard.

M: Oh, mien jong, mien wicht. Weg weedn.

M griept F bi hand en aal stoem+ vot, weg van t' toneel.

't Geluud wordt sikkom nait te hardn. Holt den inains op. Stilte (Gain boem).

'n Muzikant mit accordeon komt op. Hai speult en zingt:

       (moderato, mineur)      

             Wel wait woar Wilm woont?

             Den dood döcht doar driegn.

             Zo stoer zien schaun+ stoan,

             mor mörn mi man mist.

     (andante, majeur)

                 'n Raket is gain kroket

                 dei mond en moage vult;

                 joen hart op vrede zet.

                 't Ding ploft en moakt 'n gat

                 veur minsk stief onder 'n bult

                 Dei laiver zunlicht had. 

            

t' Caravannetje stait bi Ganzenhoeve, Zeewolde. Mout end dit joar doar weg (te koop of te geef) as stalling sloet.